ЯҢАЛЫКЛАР
Улыңны солдатка озату күңелгә берникадәр моңсулык өстәсә дә, зур горурлык ул. Кече Кайбыч авылында яшәүче Гөлирә һәм Зөфәр Гашыйгуллиннар бу көннәрдә әнә шундый горурлык һәм шатлык хисләрен кичерә. Аларга Түбән Новгород өлкәсе Дзержинск шәһәреннән, уллары Зильмир хезмәт иткән 3424нче хәрби часть командиры Алексей Решетневтан Рәхмәт хаты килде.
«Хөрмәтле Гөлирә Вәгыйзовна һәм Зөфәр Фәритович! Сезнең улыгыз Зильмир Зөфәр улы хезмәт итү чорында үзен гадел һәм алдына куелган хәрби бурычны вакытында төгәл, намус белән үтәүче хәрби итеп танытты», – диелә әлеге хатта. – «Ул хезмәттәш дуслары арасында ышаныч һәм абруй казанды, теләсә кайсы вакытта сүз белән дә, эш белән дә ярдәмгә килергә әзер тора. Хезмәт итү дәверендә хәрби осталыгы, дисциплиналы, чыдам һәм тапкыр булганы, осталыгы өчен төрле дәрәҗәдәге командирлар тарафыннан берничә тапкыр бүләкләүгә лаек булды. Сезнең улыгыз кебек егетләр хәрби бурычын үтәгәндә, халкыбыз җәмгыятебезнең һәм дәүләтебезнең имин булуына ышана ала. Сезгә чын күңелдән ныклы сәламәтлек, түземлек, шатлык-куанычлар телим. Улыгызга яхшы тәрбия биргәнегез һәм аны Россиянең чын патриоты итеп үстергәнегез өчен баш иеп рәхмәт әйтәм».
Безнең районда абыйлы-энеле Ильмир һәм Зильмир Гашыйгуллиннарны белмәгән кеше сирәктер, мөгаен. Сабантуйларда бил алышып, күп тапкырлар батыр калган егетләр алар. Мәктәптә укыган чагында чаңгы ярышларында да җиңү арты җиңү яулап килгәннәр.
– Рәхмәт хаты килгән көнне, әйтерсең лә, сумка тулы шатлык күтәреп кайттым, әтисе дә, үзем дә бик сөендек, – диде Зильмирның әнисе, Кече Кайбыч авылында хат ташучы булып эшләүче Гөлирә ханым. – Улыбыз, мәктәпне тәмамлауга ук, узган елның июль аенда үзе теләп армиягә китте. Солдат тормышыннан зарланганы юк, яратып, бар күңелен биреп хезмәт итә. Балаларыбыз кечкенәдән кул арасына кереп, эшләп, дусларына карата ярдәмчел булып үстеләр. Бер анага да газиз баласын күз күрмәгән, аяк басмаган җирләргә җибәрүе җиңел түгелдер ул. Шулай да командирларыннан рәхмәт сүзләре белән сугарылган хатлар, шатлыклы хәбәрләр килгәч, рәхәт икән ул. «Горурланабыз синең белән, улым!» дигән сүзләр язып, сөенечемне инстаграмдагы дусларым белән дә бүлештем, алар, изге теләкләрен әйтеп, лайклар куеп чыкты. Һәр ата-анага да һәрвакыт әнә шулай балалары өчен горурлык һәм шатлык хисләре кичереп яшәргә язсын!
Тагын өч-дүрт айдан Зильмир, хәрби хезмәтен тәмамлап, туган якларына кайтачак. Шатлыклы күрешүләр насыйп булсын. Кечкенәдән ныгып, чыныгып үскән егет киләчәктә хокук саклау өлкәсендә эшләргә хыяллана. Уй-теләкләре чынга аша күрсен, берүк!
Татарстан Республикасы буенча: Аязучан болытлы һава. Урыны белән бераз явым-төшемнәр, нигездә, яңгыр рәвешендә. Төнлә һәм көннең беренче яртысында аерым районнарда томан. Җил көньяк-көнбатыштан, төнлә урыны белән көчәйгәндә секундына 14 метрга кадәр минималь һава температурасы төнлә 0 метрга кадәр..+4. Көндез максималь һава температурасы +4..+9.
Бүген Татарстанның атказанган артисты, автор башкаручы Ринат Рәхмәтуллин Татарстан Республикасы Кайбыч муниципаль районының Бәрлебаш авылында концерт белән чыгыш ясады.
Морза Бәрлебаш авылында гомер итүче Наиль Шәриф улы Сибгатуллин 30 мартта үзенең 55 яшьлек юбилеен билгеләп үтте.
Хөрмәтле Наиль Шәриф улы
Сине олы бәйрәмең — 55 яшьлек юбилеең белән чын күңелдән котлыйбыз. Сиңа нык сәламәтлек, күңел тынычлыгы, гаилә шатлыгы, кайгы-хәсрәтсез көннәр, ак бәхетләр, балаларыңның һәм оныкларыңның күңел җылысын тоеп, игелекләрен күреп, бәхетле озын гомер кичерүеңне телибез. Киләчәгең җыр кебек матур, кояш кебек якты булсын.
Туачак таңнарың һәрвакыт нурлы, күк йөзең һәрвакыт аяз булсын. Гел шулай елмаеп, кешеләрне сөендереп яшә!
Тормыш юлың һәрчак балкып торсын,
Ягымлы, шат булсын күңелең.
Озын гомер, бәхет-шатлык белән
Бер кайгысыз үтсен гомерең.
Вакыты белән кар һәм юеш кар, көндез яңгыр явачак.
27 мартта Татарстанда кар һәм юеш кар явуы көтелә, көндез яңгыр явачак. Төнлә һәм иртән буран һәм бозлавык булырга мөмкин, дип кисәтә ТР Гидрометеорология үзәге. Урыны белән секундына 15-18 метрга кадәр көчле җил (Казанда 16 метрга кадәр), буран, бозлавык көтелә. Төнлә минималь һава температурасы -4..+1. Көндез максималь һава температурасы +2..+7.
Бүген район Советы һәм Башкарма комитетының актлар залында Кайбыч муниципаль район башлыгы Альберт Рәхмәтуллин җитәкчелегендә оешма һәм учреждение җитәкчеләре, авыл җирлекләре башлыклары катнашында киңәшмә узды.
Әлеге киңәшмәдә узган ике атнага йомгак ясадылар, Россия Эчке эшләр министрлыгының Кайбыч районы буенча бүлеге начальнигы урынбасары Сергей Воробьев, Кайбыч үзәк район сырхауханәсенең баш табибы Гөлнара Сафиуллина, район мәгариф бүлеге начальнигы Илмас Хәмидуллинның чыгышларын тыңладылар.
Киңәшмәдә район юлларын кардан чистарту, язгы ташкынга әзерлек, "Созвездие-Йолдызлык" яшьләр фестивален үткәрү мәсьәләләре күтәрелде. Шулай ук Альберт Илгизәр улы агымдагы елның 1 апреленнән экологик икеайлык башлануын игълан итте.
Каты көнкүреш калдыкларын җыйган өчен түләү мәсьәләсе актуаль булып кала бирә. Дүшәмбе көнне авыл җирлекләре башлык¬лары катнашында узган киңәшмәдә халыкның, хакимият органнарының һәм Бердәм исәпләү үзәгенең уртак хезмәттәшлек итү механизмы эшләнде. Әлеге киңәшмәне район башлыгы урынбасары Рәмис Хәялиев алып барды.
Киңәшмә авыл җирлекләре башлыкларында һәм халыкта килеп туган сорауларга җавап табу формасында узды. Бердәм исәпләү үзәге җитәкчесе Хәмзә Хәялиев конкрет мисаллар ярдәмендә сорауларга җавап һәм закон нигезләмәләренә аңлатма бирде.
Каты көнкүреш калдыкларын җыйган өчен гыйнвар-февраль айларына түләү квитанцияләрен агымдагы айда алдык. Халыкның яртысыннан артыгы аны түләгән инде. Киңәшмәдә әйтелгәнчә, Мөрәле авыл җирлегендә яшәүчеләр аеруча активлык күрсәткән, әлегә иң аз түләү – Федоровскоеда.
ПРОПИСКА БУЕНЧА ТҮЛИБЕЗ
Тагын бер тапкыр кабатлап әйтелде: закон кушканча, йортта пропискада булган һәр кеше әлеге хезмәт өчен түләргә тиеш. Ләкин, пропискада булып та, анда яшәмәүчеләр һәр авыл җирлегендә дә шактый булып чыкты. Хәмзә Хәялиев аңлатма биргәнчә, әгәр дә андыйлар каты көнкүреш калдыкларын җыйган өчен фактик яшәү урыны буенча түләсә, аларга авыл җирлеге администрациясенә идарәче кампаниядән түләүчеләрнең исем-фамилияләре күрсәтелгән белешмә һәм квитанция алып кайтып тапшырырга кирәк була. Ике җирдә түләү булырга тиеш түгел. Әгәр дә фактик яшәү урыны буенча түләү алып барылмаса, прописка буенча түләнергә тиеш, федераль законның нигезләмәсе шундый. Рәмис Хәялиев әйтеп узганча, авыл җирлекләре башлыкларының бурычы – ныклап тикшерелгән, төгәл мәгълүматлар базасын булдыру. Әлеге база квитанция¬ләр җибәрү өчен Бердәм исәпләү үзәгенә һәм ташламалы гражданнарга субсидия билгеләү өчен социаль яклау бүлегенә бердәм булачак. Авыллардагы йортларда яшәүчеләр исемлегенә төгәллек кертү дәвам итәчәк. Авыл җирлекләре башлыклары алдында торган мәсьәлә – хәрби хезмәткәрләрне, чит илдә яшәүчеләрне, иректән мәхрүм итү урыннарында булучыларны исемлекләрдән төшерү. Бу раслаучы документлар ярдәмендә эшләнә. Моның өчен үзара эшчәнлек алып бару тәртибе, тәкъдим ителүче белешмәләрнең һәм башка документларның формасы билгеләнгән.
СУБСИДИЯ КЕМНӘРГӘ БИРЕЛӘ?
– Льготалы категория гражданнарына субсидия билгеләү турыдан-туры каты көнкүреш калдыклары җыйган өчен түләүгә бәйле, – диде Республика матди ярдәм күрсәтү үзгенең Кайбыч районындагы бүлеге мөдире Исламия Нигъмәтуллина. – Әгәр дә субсидиягә дәгъва итүче ике ай дәвамында коммуналь хезмәтләрнең берәрсе өчен генә булса да түләмәсә, аңа субсидия билгеләнсә дә, түләнми.
Ул ташламага ия гражданнарга инвалидлар, хезмәт ветераннары, дәүләт бүләгенә ия булучылар, күп балалы гаиләләр керүен әйтте. Шуңа күрә хезмәтләр өчен вакытында һәм тулысынча түләү мөһим. Барлык хезмәтләр өчен дә түләүчеләр субсидия алган инде.
ДОКУМЕНТЛАР ТӘРТИП ЯРАТА
Каты көнкүреш калдык¬ларын җыйган өчен түләү мәсьәләсе буенча фикер алышканда кайбер проблемаларны хәл итү кирәклеге дә ачыкланды. Адресларның төгәл булмавы эшне катлау¬ландыра, урам исемнәрен һәм йорт номерларын тиеш¬ле тәртипкә китерү сорала. Күпләр күчемсез милеккә, җиргә булган документларына еллар буена да күз салмый. Аларда да төгәлсезлекләр булырга һәм бу күчемсез милек белән килешүләр төзегәндә яки салым түләүләрен башкарганда зур проблемалар китереп чыгарырга мөмкин. Әлеге мәсьәләләрне чишелешсез калдырырга ярамый. Исегездә тотыгыз: проблемаларга юлыкмас өчен, барлык документларыгыз да тәртиптә булу мөһим.
Сүз уңаеннан су өчен артыгын түләргә теләмәүчеләргә, исәпләү приборы урнаштырып, тотылган су өчен генә түләргә киңәш ителде. Тора-бара барлык хуҗалыклар да счетчик буенча түләүгә күчәчәк.
Хәмзә Хәялиев каты көнкүреш калдыкларын җыйган һәм электр энергия-сеннән файдаланган өчен бер квитанция белән түләү мәсьәләсенә дә ачыклык кертте.
– Ике квитанцияне берләштерүне ел ахырына гына планлаштырабыз. Якын айларда клиентлар базасына ачыклык кертелеп бетәчәк, – диде ул.
Шунысы куандыра, районда яшәүчеләрнең күпчелеге закон таләпләрен үтәүгә җаваплы карый. Андыйларга шәхси репутациясе дә, район даны да кадерле. Шуңа күрә барлык хезмәтләр өчен дә вакытында түләп баралар. Кайбыч почтасы начальнигы Гөлсәрия Галиәскәрова әйтүенчә, квитанцияләр таратылып берничә көн үтүгә үк, хат ташучылар түләүләрнең 30 процентын җыеп та алган.
Шәхси эшмәкәр «Хикмәтуллин»ның вәкиле мөһим үтенеч белән мөрәҗәгать итте. Язгы юл өзеклекләре вакытында машиналар һәр йортның капка төбенә, һәр тыкрыкка кадәр барып җитә алмый. Юлларны бозмау максатында халыктан, авыл җирлекләре башлыкларыннан калдыклар тутырылган пакетларны һәм капчыкларны, мөмкинлектән чыгып, машина йөри ала торган юлга чыгарып куюларын сорады.
Башка төр түләүләрне почтада түләргә гадәтләнгән өлкән яшьтәгеләр каты көнкүреш калдыкларын җыйган өчен дә хат ташучылар аша түли ала. Моның башка төрле ысулы да бар –дәүләт хезмәтләре порталы аша да түләргә була. Моннан хезмәт хакын банк картасына алучылар файдалана ала. Бу җайлы да, өйдән чыгарга да кирәкми, күп вакыт та таләп ителми.
Каты көнкүреш калдыкларын җыю һәм моның өчен түләү мәсьәләләре буенча сораулар туса, авыл җирлеге администрациясенә мөрәҗәгать итәргә мөмкин.
Ябалак авылында гомер итүче Гөлия Нургали кызы Хаялеева 23 мартта үзенең 55 яшьлек юбилеен билгеләп үтте.
Хөрмәтле Гөлия Нургали кызы!
Сине олы бәйрәмең — 55 яшьлек юбилеең белән чын күңелдән котлыйбыз. Сиңа нык сәламәтлек, күңел тынычлыгы, гаилә шатлыгы, кайгы-хәсрәтсез көннәр, ак бәхетләр, балаларыңның һәм оныкларыңның күңел җылысын тоеп, игелекләрен күреп, бәхетле озын гомер кичерүеңне телибез.Туачак таңнарың һәрвакыт нурлы, күк йөзең һәрвакыт аяз булсын. Гел шулай елмаеп, кешеләрне сөендереп яшә!
Һәр яңа көн бәхет алып килсен,
Алсу таңнар күмсен шатлыкка.
Яшәү дәрте янсын йөрәгеңдә,
Картаерга һич тә ашыкма
20 март көнне Ябалак авылында яшәүче Калаева Дарья Федоровна үзенең 70 яшьлек юбилеен билгеләп үтте. Кайбыч муниципаль район башлыгы Альберт Илгизәр улы Рәхмәтуллин исеменнән юбилярны юбилее уңаеннан Ябалак авыл җирлеге башлыгы Гизатуллина Мөслимә Фәрит кызы тәбрик итте, аңа ныклы сәламәтлек, озын гомер теләде.
Соңгы вакытта газ белән агулану очраклары ешайды, шул исәптән Татарстан Республикасы территориясендә, 2019 ел башыннан гына газ белән 20 гә якын кеше агуланган, шуларның берничә очрагы фаҗига - үлем белән тәмамланган..jpg)